سۆمۆ: عێراق ساڵانە بڕی 5 ملیار دۆلار بۆ هاوردەکردنی سووتەمەنی خەرج دەکات

کۆمپانیای نیشتمانیی بەبازاڕکردنی نەوتی عێراق (سۆمۆ) لە ڕاپۆرتی ساڵانەی خۆیدا ئامارەکانی پەیوەست بە هاوردەکردنی بەرهەمە نەوتییەکان بۆ ناوخۆی وڵات بڵاوکردەوە، کە تێیدا ئاستی خەرجییەکان و بڕی ئەو سووتەمەنییەی لە دەرەوە کڕدراوە، خراوەتە ڕوو. ئامارەکان نیشانی دەدەن کە عێراق سەرەڕای پێگەی وەک وڵاتێکی سەرەکیی بەرهەمهێنەری نەوت، هێشتا بۆ پڕکردنەوەی پێداویستییەکانی ناوخۆ پشت بە بازاڕە جیهانییەکان دەبەستێت.

بەپێی داتا فەرمییەکانی سۆمۆ، هاوردەکردنی بەنزین و گازوایل پشکی شێری خەرجییەکانیان بردووە، کە تێچووی کۆی گشتیی بەرهەمە پاڵاوکراوە هاوردەکراوەکان لە ساڵێکدا گەیشتووەتە نزیکەی 5 ملیار دۆلار. ڕاپۆرتەکە وردەکاریی مانگانەی بڕی هاوردەکراوەکانی تێدایە کە ئاراستەی وێستگەکانی کارەبا و بەنزینخانەکان کراون تاوەکو ڕێگری لە دروستبوونی قەیرانی سووتەمەنی بگیرێت، بەتایبەت لە وەرزەکانی هاوین و زستاندا کە خواست لەسەر وزە بەرز دەبێتەوە.

عێراق وەک یەکێک لە ئەندامە سەرەکییەکانی ڕێکخراوی ئۆپێک، خاوەنی یەدەگێکی گەورەی نەوتی خاوە، بەڵام بەهۆی کۆنیی ژێرخانی پاڵاوگەکان و کەمیی توانای بەرهەمهێنانی سووتەمەنیی مۆدێرن، ناچارە ساڵانە بڕێکی زۆر لە داهاتی نەوت بۆ کڕینەوەی بەرهەمە پاڵاوکراوەکان تەرخان بکات. حکوومەتی عێراق لەم دواییانەدا ستراتیژێکی نوێی بۆ گەیشتن بە خۆبژێوی گرتووەتە بەر، کە تێیدا تەرکیز خراوەتە سەر پەرەپێدانی پاڵاوگەکانی بێجی و بەسرە و کارپێکردنی تەواوەتی پاڵاوگەی کەربەلا، تاوەکو لە چەند ساڵی داهاتوودا هاوردەکردنی سووتەمەنی بە تەواوەتی ڕابگیرێت.