زیندايا بە خشڵێکی مێژوویی ناوچەی زێویەی کوردستانەوە لە هۆڵیوود دەرکەوت و هەڵای نایەوە

دەرکەوتنی زیندايا ئەکتەری بەناوبانگی جیهانی، بە خشڵێکی مێژوویی کە تەمەنەکەی بۆ نزیکەی 3000 ساڵ پێش ئێستا دەگەڕێتەوە، لە کاتی نمایشکردنی فیلمی ئۆدیسە (The Odyssey) شەپۆلێکی بەرفراوانی لە مشتومڕ و گفتوگۆ لە نێوان هەوادارانی و ڕەخنەگراندا دروستکرد.

ئەو گوارانەی کە زیندايا پۆشیبووی، لە میدالیا زێڕینە کۆنەکان دروستکراون کە مێژووەکەیان بۆ سەدەی 7ـی پێش زایین دەگەڕێتەوە. ئەم پارچە مێژووییانە پەیوەستن بە ''گنجینەی زێویە" کە لە کۆتایی چلەکانی سەدەی ڕابردوو (1940ـەکان) لە ناوچەی زێویەی سەر بە پارێزگای سنە لە کوردستانی ئێران دۆزرایەوە. ''گلێن سپایرۆ"، زێڕنگەری ناوداری لەندەنی، ئەم پارچە شوێنەوارە مێژووییانەی گۆڕیوە بۆ گوارەیەکی سەردەمیانە و بە زێڕی عەیار 18 و ئەڵماس ڕازاندوویەتەوە.