تەقینەوەیەک لەناو مزگەوتێک لە پاکستان 17 کوژراوی لێکەوتەوە

فەرماندەی پۆلیسی هەرێمی خەیبەر ڕایگەیاند، تەقینەوەیەک لەناو مزگەوتی بارەگای فەرماندەیی پۆلیس ڕوویداوە و بەپێی ئامارە سەرەتاییەکان 17 کەس گیانیان لەدەستداوە، کە 6 کەسیان ئەندامی هێزەکانی پۆلیس بوون. هەروەها زیاتر لە 40 کەسی دیکەش بریندار بوون.

تیمەکانی فریاکەوتن و ئەمبوڵانس بەپەلە گەیشتوونەتە شوێنی ڕووداوەکە و کار بۆ گواستنەوەی بریندارەکان بۆ نەخۆشخانەکان دەکەن. هێزە ئەمنییەکان دەستیان بە لێکۆڵینەوە کردووە بۆ زانینی چۆنیەتیی ڕوودانی ئەم تەقینەوەیە و ئاشکراکردنی ئەنجامدەرانی.

ئەم هێرشە کە لەناو بارەگایەکی ئەمنیدا ڕوویداوە، وەک پێشێلکارییەکی گەورەی ئەمنی لە قەڵەم دەدرێت و مەترسییەکانی توندوتیژی لەو ناوچەیەدا زیاتر کردووە.