گوتەبێژی فەرماندەی گشتیی هێزە چەکدارەکانی عێراق ڕایگەیاند، عێراق و کوەیت گەیشتوونەتە ڕێککەوتنێکی ستراتیژی بۆ بەرەنگاربوونەوەی تۆ...
گوتەبێژی فەرماندەی گشتیی هێزە چەکدارەکانی عێراق ڕایگەیاند، عێراق و کوەیت گەیشتوونەتە ڕێککەوتنێکی ستراتیژی بۆ بەرەنگاربوونەوەی تۆڕەکانی چەواشەکاریی میدیایی و دانانی میکانیزمێکی تایبەت بۆ چاودێریکردنی گوتاری ڕقوکینە لە نێوان هەردوو وڵاتدا.
ئەمڕۆ شەممە 26ـی ئەیلوولی 2026، سەباح نوعمان، گوتەبێژی فەرماندەی گشتیی هێزە چەکدارەکان لە لێدوانێکدا بۆ ئاژانسی فەرمیی هەواڵی عێراق ڕایگەیاند: "ئەو گفتوگۆ بەرفراوانانەی شاندی فەرمیی عێراق لە دەوڵەتی کوەیت ئەنجامی دان، بە ڕێککەوتنێکی ستراتیژیی هاوبەش کۆتاییان هات بۆ سنووردانان بۆ دروستکردنی هەواڵی ساختە و بڵاوکردنەوەی درۆ کە هۆشیاریی هاووڵاتییان لە هەردوو وڵاتی برا دەکەنە ئامانج".
سەباح نوعمان ئاماژەی بەوە کرد، کۆبوونەوەکان لەگەڵ وەزارەتەکانی ناوخۆ و بەرگریی کوەیت، بە وردی مەترسیی شەڕی دەروونییان دەستنیشان کردووە، کە خۆی لە بەرهەمهێنان و پەخشکردنی ناوەڕۆکی چەواشەکارانە و ڕاپۆرتی هەڵبەستراودا دەبینێتەوە و لایەنە گوماناوییەکان لەو ڕێگەیەوە هەوڵی تێکدانی پەیوەندییە برایەتییە پتەوەکان دەدەن.
گوتەبێژی فەرماندەی گشتیی هێزە چەکدارەکان ڕوونیشی کردەوە: "هەردوولا میکانیزمێکی چاودێریی پسپۆڕانە و ڕاستەوخۆیان پەسەند کردووە بۆ مامەڵەکردنی دەستبەجێ لەگەڵ هەر گێڕانەوەیەکی درۆ یان گوتارێکی هاندەرانە و ڕقوکینە کە جارجارە دەردەکەون، ئەوەش بە ئامانجی جیاکردنەوەی ڕاستییەکان بە وردی و لەباربردنی هەوڵەکانی شێواندنی ڕاستییەکان".
لە کۆتایی قسەکانیدا، گوتەبێژی فەرماندەی گشتی ئاشکرای کرد کە ئامانجی سەرەکی لەم هەماهەنگییە، پووچەڵکردنەوەی هەر هەوڵێکە بۆ ئاراستەکردنی ڕای گشتی لە ڕێگەی زانیاریی وەهمییەوە، هەروەها دامەزراندنی سەکۆیەکی هاوبەشە کە پشت بە متمانە و پیشەییبوونی بەرز دەبەستێت بۆ وشککردنی سەرچاوەکانی چەواشەکاری، بە جۆرێک کە سەقامگیریی ئەمنی و مەعنەویی هەردوو وڵات و گەلی برا بەهێزتر بکات.
