لە چوارچێوەی هەوڵە سیاسییەکان بۆ پێکهێنانی کابینەی دەیەمی حکوومەتی هەرێمی کوردستان، پارتی دیموکراتی کوردستان و یەکێتیی نیشتمانیی کوردستان بە ئاڕاستەی یەکلاکر...
لە چوارچێوەی هەوڵە سیاسییەکان بۆ پێکهێنانی کابینەی دەیەمی حکوومەتی هەرێمی کوردستان، پارتی دیموکراتی کوردستان و یەکێتیی نیشتمانیی کوردستان بە ئاڕاستەی یەکلاکردنەوەی پڕۆسەکە هەنگاوی چڕتر و خێراتر دەنێن.
پشتیوان سادق، ئەندامی مەکتەبی سیاسیی پارتی دیموکراتی کوردستان، لە لێدوانێکی بۆ کەناڵەکانی راگەیاندن، جەختی لەسەر هەوڵە چڕوپڕەکانی پارتی کردەوە بۆ پێکهێنانی کابینەی نوێی حکوومەت و رایگەیاند: "بارودۆخەکەمان لە ناوچەکە و عێراق و کوردستانیش زۆر هەستیارە ، ئەمە وامان لێدەکات کە هەموو حزبە سیاسییەکان بە تایبەتی پارتی دیموکراتی کوردستان و یەکێتیی نیشتمانیی کوردستان زیاتر هەوڵ بدەن بۆ ئەوەی کابینەی دەیەمی حکوومەتی هەرێمی کوردستان پێکبێت".
پشتیوان سادق راشیگەیاند کە پێکهێنانی حکوومەت دواکەوتووە ، نۆزدە بۆ بیست مانگە خەڵک دەنگی داوە، بەڵام ئەوەی جێگەی دڵخۆشییە ئەمڕۆ لە هەموو کات زیاتر پارتی و یەکێتی هەوڵەکانیان چڕکردووەتەوە بۆ ئەوەی بتوانن دەزگا شەرعییەکان کارا بکەنەوە و ئیشاڵڵا هەواڵی خۆش بدرێتە هەموو خەڵکی کوردستان. هەروەها پشتیوان سادق دووپاتیکردەوە کە پەیوەندی و هەماهەنگییەکان ئەرێنین.
لە لایەن خۆشییەوە ڕێباز بێرکۆتی، ئەندامی سەرکردایەتیی یەکێتیی نیشتمانیی کوردستان، سەبارەت بە هەوڵەکانی پێکهێنانی کابینەی دەیەمی حکوومەتی هەرێمی کوردستان، لە لێدوانیدا بۆ میدیاکان رایگەیاند: "هەنگاوەکان چوونەتە پێش و دانیشتنی باش هەبووە، بەڵام پێویستە راگەیاندن هاوکار بن بۆ ئەوەی هێواش هێواش بچێتە پێ".
هەروەها ڕێباز بێرکۆتی گوتی: "ئەساسی باش و گفتوگۆی باش و ڕێزگرتنی ڕایەکان هەیە ، کەواتە ڕێز لە ڕای یەکتر دەگرین و هەموومان لەبەردەم بەرپرسیاریەتیی هاوبەشداین".
ڕێباز بێرکۆتی ئەندامی سەرکردایەتیی یەکێتی پێشبینی ئەوەشی کرد کە لە ڕۆژانی داهاتوو کارەکان زیاتر بچنە پێشەوە و لەبارەیەوە ئاشکرای کرد: "نیەتی باش هەیە ، سەقفی زەمەنی نییە، ئیرادەکە باشە و هەوڵەکان هەوڵی خێرە و ئیشاڵڵا بەرەو باشی دەڕوات". ڕێباز بێرکۆتی جەختیشی کردەوە: "لە هەموو کاتێک زیاتر لێکتێگەیشتن و نزیکبوونەوە هەیە.
