سوپاسنامەیەک لە مەكتەبی سیاسی پارتی دیموکراتی کوردستانەوە

مەكتەبی سیاسی پارتی دیموكراتی كوردستان سوپاسنامەیەكی ئاراستەی هەموو ئەو كەس و لایەنانە كرد كە ڕۆژی 16ی ئاب لە یادی 80 ساڵەی دامەزراندنی پارتی و لەدایكبوونی سەرۆك بارزانی، بە پەیام و پیرۆزبایی بەشدارییان كردبوو.

لە سوپاسنامەكەی مەكتەبی سیاسی پارتی هاتووە "پەیامەکانتان بۆ جەنابی سەرۆک بارزانی و مەکتەبی سیاسی و ئۆرگانەکانی دیکەی پارتیمان، هەڵگری گیانی برایەتی و هاوخەباتی و پێکەوەیین، لە بەرامبەردا پێزانینی زۆرمان هەیە و سوپاسگوزارین".

مەكتەبی سیاسی پارتی هەروەها سوپاسی سەرجەم ئۆرگان، کادیر و ئەندام و جەماوەری دڵسۆزی پارتی و هەروەها دەزگاكانی راگەیاندن كرد کە بە جۆش و خرۆش و گیانی بەرزی پارتایەتییەوە، ئەو یادە مەزنەیان بەرز و پیرۆز كرد.

دەقی سوپاسنامەكەی مەكتەبی سیاسیی پارتی بەبۆنەی 16ی ئاب:-

بە ناوی مەکتەبی سیاسی و کۆمیتەی ناوەندیی پارتی دیموکراتی کوردستانەوە، سوپاس و پێزانینمان ئاراستەی بەڕێزان سەرۆک، سکرتێر، ئەمیندار و مەکتەبی سیاسی و سەرکردایەتی حزب و لایەنە کوردستانی و عیراقییەکان، سیاسەتمەدار و حزبە تێکۆشەرەکانی هەر چوار پارچەی کوردستان، بەڕێزان سەرۆکوەزیران و بەرپرسانی حکوومەتی فیدراڵی عیراق و دامەزراوەکانی دەوڵەت و هاوپەیمانیەتی و فراکسیۆنە پەرلەمانییەکان، هەروەها سوپاسی نوێنەرانی وڵاتان لە هەرێمی کوردستان و عیراق، سیاسەتڤان و کەسایەتییەکانی وڵاتانی دۆست، رێکخراوەکانی کۆمەڵگای مەدەنی و ناوەند و دامەزراوە زانستی و ئەکادیمی و میدییاییەکان و کەسایەتییە ئایینی و کۆمەڵایەتییەکان و نوێنەرانی پێکهاتەکان و فەرماندە و پێشمەرگە قارەمانەکان و خەڵکی بەئەمەکی کوردستان و سەرجەم ئەو کەس و لایەنانە دەکەین، کە لە بیرەوەری (16ی ئاب) هەشتا ساڵەی دامەزراندنی پارتی دیموکراتی کوردستان و ساڵیادی لەدایکبوونی جەنابی سەرۆک بارزانی، بە پەیام و پیرۆزبایینامەکانیان لەو یادە شکۆدارەدا بەشداربوون.